Über mi

I bin Forscher und Dozent an dr Ostschwizer Fachhochschual (OST), am Institut für Modellbildig und Simulation. Au döt schaffi an Planigsproblem us dr Praxis: unordentlich, vielschichtig und selta mit dr Datagrundlag, wo ma sich wünscht.

Für söttigi Ufgaba gits meistens a usgfuxti Excel-Tabella oder öpper mit viel Erfahrig und amana guata Buuchgfühl. Mit dem khunt ma wiit, aber es isch ufwändig und ma holt selta ds Bestmöglicha usa. Und irgendwenn isch dr Punkt erreicht, wo dia Asätz nümma funktioniaren. Denn helf i: mit durchdenkta, aber pragmatischa Lösiga für Lüt und Firma, wo guati Antworta bruchen, uf Wunsch sogar uf Knopfdruck.

Was i macha

• Planigsproblem verstoh, modelliera und durarechna, egal wia unordentlich dass sie sind
• Mit Optimierig und Simulation Lösiga finda: rechna statt roota
• Resultat liefera, wo ma brucha kann: Bricht, Tools, Apps und APIs
• KI isetza, wo sie au öppis bringt

Wiani schaffa

Zerscht lohni miar zeiga, wia hüt planet wird: Über was wird entschida und vo wem? Welli Data gits? Und wo druckt dr Schuah würkli? Denn baui as erschts Modell, teschta Lösiga und verbessera es so lang, bis es abbildet, was würkli zählt. Am Schluss gits an Bericht mit klara Handligsempfehliga oder as Werkzüg, wo im Alltag funktioniert.

Mini Philosophie

• eifach > kompliziert
• baua > schnorra
• schnelli Iteratioona > endloses plana
• direkt reda > formelli Sitziga
• praktischi Lösiga > theoretischi Eleganz